لقطة مع سائق تاكسي

انا : السلام عليكم

السائق : و عليكم السلام

أنا : عند *******

السائق : ان شاء الله بس استئذنكم اروح البنزينة أموون لحسن خايف العربية تفضي مني في نص السكة ، و ما تخافوش التوصيبة دي عليا .

انا : مفيش مشاكل اتفضل حضرتك

السائق : بس انا اقصد التوصيلة من هنا لحد البنزينة ، مش كلها

انا : احنا عنينا لحضرتك

السائق : ربنا يخليكي و يخلي عنيكي ... اللهي ربنا يرزقك بابن الحلال

انا مش عارف شباب الايام دي ايه اللي جرالهم ؟!

انا : اطسوا في نظرهم يا عمو

السائق : ( بعد ان مات علي نفسه من الضحك لخبث ردي ) و الله يا بنتي انا ما بقتش عارف ايه اللي بيجرالهم

اللي يزعلك بجد الايام دي انك تسمعي ان شاب ما كملش سنة جواز و نلاقيه طلق مراته ... و نسأله ليه يا ابني كده ؟! يرد عليك و يقولك : أصلها ما كانتش بتحب أمي أو أصلها بتتكبر علي أهلي او او ... الخ

و أحيانا للاسف بيبقي في ما بينهم أطفال بس ما بيراعوش حق ربنا في الطفل ده .. كل واحد فيهم بيستغل الطفل ده عشان يغيظ التاني بيه!!

و استطرد قائلا : يا بنتي ده حتي المخطوبين بيفسخوا الخطوبة علي أسباب تافهة زي مثلا : طقم المعالق علي مين !!!!

انا : و الله يا عمو معاك حق في كل اللي قلته و حكاية الطلاق المبكر دي منتشرة جدا الايام دي ، ده حتي كنت قريت ان اعلي نسبة طلاق في الوطن العربي موجودة في مصر و ان 4 حالات من كل 10 جوازات بيطلقوا !!!

السائق : شباب الايام دي يا بنتي ما بيشلش مسؤلية و لا عارف مفهوم الحياة الزوجية الصح و لا مقدر أن فيه شوية تنازلات سواء من ناحية الولد أو من ناحية البنت

ده كان الحوار اللي دار بيني و بين سائق التاكسي القديم المتهالك اللي ركبته غصب عني عشان كانت رجليا وجعاني و اللي اعدت اسمع له و اتحاور معاه رغم ان ده مش من طبعي !

لكن المرة دي مش عارفة ليه اعدت اتكلم معاه و اسمعله ؟!

يمكن عشان راجل مسن ، أو يمكن عشان فتح موضوع مهم قووووووي و هو : (( الطلاق و نسبته المرتفعة و خصوصا المتزوجون حديثا !))

اعدت افكر طب ايه السبب ؟ و يا تري العيب عيب مين ؟ الولد و لا البنت ؟

اكتشفت اسباب كتيرة منها الاتي :

1- الآباء :

ما تستغربوش فعلا الاباء سبب كبير لأنهم ربوا أولادهم علي الترف و ما عودهومش علي تحمل المسؤلية من صغرهم و لما كبروا جهزوهم و جابلهم العفش ، فالشباب محسوش بتعب في تكوين البيت ده فبالتالي القرار بهدمه خطوة سهلة و علي رأي المثل :

easy come easy go

2- الاهتمام بالمظاهر الكدابة :

زي مثلا لما يقولوا لأب بنتك جالها عريس تلاقيه من الاوائل الحاجات اللي بيسأل عليه : حيجيب شبكة و لا لأ ؟!

و علي الناحية التانية الاولاد ، قال رسول الله صلي الله عليه و سلم : ( تنكح المرأة لأربع : لمالها و لحسبها و لجمالها و لدينها فاظفر بذات الدين تربت يداك )

اهتمام الاولاد بينحصر في المال و الجمال و الحسب و بينسوا او عفوا بيتناسوا الدين

3- عدم التكافؤ بين الزوجين و اهمال الشواهد اللي بتبان في فترة الخطوبة .. و الشواهد دي هي اللي بتحدد اذا كان في تكافؤ اجتماعي او مادي او حتي تكافؤ و توافق في اسلوب التربية و الفكر

4- الازمة الاقتصادية و تفشي العنوسة بين البنات و ده عامل كبير جدا في هدم البيوت ، فبعض الاباء و الامهات بيخافوا من شبح العنوسة و بالتالي بيجوزوهم لأول من يدق بابهم من العرسان و ييسروا له الامور جدا و يفسروا التيسيير دخ بدعوة الازمة الاقتصادية ، و أصل الشباب حيجيبوا منين ؟! و في الحقيقة بيبقي خوف علي البنت من العنوسة و بعد ما تقع الفاس في الراس و تتجوز البنت تكتشف انه مش مناسب ليها تماما و بعد كده تطلب الانفصال !

5- عدم وجود ثقة بين الطرفين و ده بيبدأ من فترة كتب الكتاب و تحديد المهر و نسمع الشباب بيقولوا مش حنكتب مهر كبير عشان المأذون ما ياخدش كتير ، يقوم أهل العروسة يطالبوه بكتابة وصل امانة علي نفسه بمبلغ كبير ، في شباب بيوفقوا و في شباب بترفض - و انا مع اللي يرفض - ، و ساعة كتابة القايمة تلاقي أهل البنت بيغالوا في كتابتها جدا لدرجة تصل الي اتفه التفاهات زي كوالين الأبواب !!!!!

طب دلؤتي -بعد الشر - لو بنتك تعبت في معاه و طلبت الطلاق حتعمل ايه بالحاجات دي ! العفش و حيسوس و لو بعته الفلوس بتتصرف و لو عاوز تحرف قلب طليق بنتك شوية و حيروح يتجوز تاني .

و بقي انت مستأمنة علي بنتك و مش مستأمنة علي شوية خسب !!!

انا ما برجعش الخطأ علي الأولاد أو علي البنات أو بهاجم اي من الطرفين انا بطرح وجهة نظري

أول لقطة ( عفوا هذا لا يجوز )

بسم الله الرحمن الرحيم

** عندما نري الأبناء يسيئون معاملة الاباء و يستهترون بكلامهم يجب ان ينطق لساننا و يقول : (( عفوا ، هذا لا يجوز !! ))

فلقد سأل رجل رسول الله : ( من احق الناس بحسن صحابتي ؟ ) فقال - عليه الصلاة و السلام - : (امك ) ، فقال : " ثم من ؟" ، قال ( أمك ) ، قال " ثم من ؟ " ، قال : (أمك ) ، فقال : " ثم من ؟ " قال ( أبوك ).. صدق رسول الله عليه و سلم

اًذكر هؤلاء الأبناء بأنهم في يوم من الأيام سيصيرون آباء و سيفعل بهم أبناؤهم ما فعلوه في آبائهم .

يا ابن ادم افعل ما شئت فكما تدين تًدان

** عندما نري الفتيات المسلمات يرتدين ما يكشف أكثر مما يستر يجب ان نصيح : (( عفوا ، هذا لا يجوز !! ))

تذكري يا غاليتي بأن صفات الحجاب الشرعي ان لا يكون واصفا أو كاشفا ستقولين الموضة و اذا لم اسايرها سيقولون عني رجعية متخلفة!

تذكري بأن الجنة حفت بالمكاره و حفت النار بالشهوات

ما أجمل الرجعية و التخلف

احذري .. فإن أكثر أهل النار هم النساء.. عفانا الله و اياكم

** عندما ننظر الي الشرفات و نجد الفتيات يطلون كاشفات شعورهن و هن في الاصل محجبات يجب ان نصيح : (( عفوا ، هذا لا يجوز !! ))

فالناس اللذين يرونك في الطرقات هم نفسهم اللذين يرونك من شرفتك

ستبررين ذلك بأن لا أحد يراكِ - و هذا ما تتصورينه -

غاليتي هناك المتربصين من ضعاف القلوب ، همهم الشاغل هو انتِ ! احمي نفسك منهم و من نظراتهم اللتي تنهشك

يا اختاه البنات كالتفاحات و لا أحد يأخذ التفاحة المعطوبة

** عندما تسمع الشباب يتفوهون بكلمات غريبة غير مفهومة لا استطيع نسبها الي اللغة العربية و تكون الافلام التافهة في الاغلب مصدرها

أو الكلمات الاجنبية اللتي يدسها الشباب في حواره عند ذلك يجب ان نهب و نقول : (( عفوا ، هذا لا يجوز ))

أسمعتم شاب أمريكي يحشر ملاما عربيا وسط كلامه ؟!

بالطبع لا فانه يكتفي بلغته الانجليزية في التعبير عن ذاته و هو منتمي الي لغته علي عكس بعض الشباب العربي اللذي يتملص من ثقافته و يغير هويته كما يغير الثعبان جلده

** عندما نري الشاب بتباهي بذلك الشئ الاسطواني اللذي بين اصبعيه و ينفث منه الهواء وسط اصدقاءه و يسب من لا يجاريه في تدخينه بأنه ( مش راجل و لازم يسترجل شوية ) عندها يجب الصراخ بـ (( عفوا ، هذا لا يجوز !! ))

هل الرجولة بالتدخين ؟! لا يا اخي الرجولة بأخلاقك الصالحة و معاملاتك الراقية و ليست بهواء يدخل الي رئتيك و تلفظه من أنفك بعد ان يكون سمم و أذي كل الأعضاء اللتي مر عليها !

** عندما نسمع الشاب الجامعي يقول ( ما ان انهي دراستي في تلك البلد العقيم ساسافر الي بلد أوروبي و لن اعود ابدا ! )

وقتها يجب ان نقول (( عفوا ، هذا لا يجوز !! ))

يا اخي اطلب العلم و لو في الصين و لكن هل من المعقول بعد ذلك ان تحرم دينك من علمك ؟!

اذا سافر النوابغ امثالك و لم يعودوا فمن يبقي في الوطن العربي لنشله من براثن الجهل و الظلمة .. تذكر ان كل الدول الاوروبية استدت نهضتها من الحضارة الاسلامية الاندلسية .. فلم لا نستعيد وضعنا ؟!

** عندما تصلك رسالة علي بريدك الالكتروني في بدايتها ( استحلفك بالله العظيم ان تنشرها ) يجب ان نقول (( عفوا ، هذا لا يجوز !! ))

تأكد اولا من هذه الرسالة و مضمونها لأنها في الاغلب تكون احاديث ضعيفة و تصل الدرجة الي حد الافتراءات !

** عندما نري العبرات تسيل من أعين المسلمين المستضعفين في فلسطين و العرق يجب ان تثور كل خلية من خلايانا و تصيح : (( عفوا ، هذا لا يجوز ))

اليوم فلسطين و غدا نحن - اذا لم نتحد - استر يا أرحم الراحمين

لا يجوز ان نتجاهل مثل تلك المشاهد و نعلق ليس باليد حيلة !

بالعكس .. استجمع قواك و قل ( لا) .. تظاهر و قاطع و لا تنسي الدعاء فذلك أضعف الايمان

النصر قريب ان شاء الله